Vom zwete Stock steigsch Du dann runner
Trittsch uf die Stroß gonz frisch und munter,
doch plötzlich frägsch Du Disch verdrosse
"Hab isch a wirklich abgeschlosse?"
Du känscht schwöre viele Eid,
steigsch dennoch nuff, Dir selbscht zum Leid,
Un do rufts aus em Hinnerhalt
Chef, Sie were langsam alt!

Brauch Du mol ebbes aus em Schrank
Der gut gfillt is - Gott sei Dank.
Kaum hosch uffgemacht die Tür
Frägsch Du Disch "Was will ich hier?"
Verschteert bisch Du, daß in Sekunde,
des, was Du vorhosch is verschwunde.
Un do rufts aus em Hinnerhalt
Chef, Sie were langsam alt!

Brauchsch Du mol Dei Bigeleise
Und gescht aschließend uf Reise,
bangsch Du 3 Woche - ugeloge -
Hab isch de Stecker rausgezoge?
Sitzt der vielleicht noch in de Wänd?
Bin ich inzwischen abgebrennt?
Un do rufts aus em Hinnerhalt
Chef, Sie were langsam alt!

Un fährsch Du mol wo anerscht hi
Bewegsch Du hordisch in doim Sinn
Doi Schparbuch beschtens zu verschtecke
Damit keen Dieb des konn entdecke,
Brausch Du Doi Geld, donn hosch indesse
De heimliche Platz total vergesse
"O Gott" stähnsch donn, gonz starr vor Schreck:
"Was mach isch bloß, moi Geld is weg!"
Un do rufts aus em Hinnerhalt
Chef, Sie were langsam alt!

Zum Frühstick nimsch Du 3 Tablette
Die solle Doi Gedächtnis rette,
Du frägsch Dich plötzlich gonz beklomme
"Hab ich sie eigentlich genomme?"
Ja, is moi Denke donn noch dicht?
Un zweemol nemme derf ich net!
Un do rufts aus em Hinnerhalt
Chef, Sie were langsam alt!

Maschine konn ma repariere
Un a des Getriebe schmiere,
is mol da Fernseher kaputt,
en kleener Chip, schun is es gut.
Doch wenn der Kalk im Hern sich dichtet
Gibt's nix mehr, was des Dunkel lichtet.
Doch fellt die düschter Stimm glei oi,
Chef, finne Sie sich noi!!

Von unserer Pfälzer
Mundartdichterin Sigi Ebert